កីឡាករប្រដាល់ ប្រេស៊ីល THIAGO TEIXEIRA MACHA DO និងភរិយា ទទួលបានសញ្ជាតិខ្មែរ

រាជធានីភ្នំពេញ៖ ព្រះករុណា ព្រះមហាក្សត្រ សម្ដេចព្រះបរមនាថ នរោត្តម សីហមុនី បានចេញ​ព្រះរាជក្រឹត្យ ត្រាស់បង្គាប់ ផ្តល់សញ្ជាតិខ្មែរ ដោយសញ្ជាតូបនីយកម្មជាចង្កោមគ្រួសារ ជូនដល់​កីឡាករប្រដាល់ ​ប្រេស៊ីល លោក ធីអាហ្គូ តេយសឺរ៉ា ម៉ាឆាដូ (THIAGO TEIXEIRA MACHADO) និងភរិយា។

ព្រះរាជក្រឹត្យ ដែលបានផ្សព្វផ្សាយ នៅយប់ថ្ងៃទី១១ ខែមេសា ឆ្នាំ២០២៣ នេះ ​បង្ហាញថា «ផ្តល់​សញ្ជាតិ​ខ្មែរ ដោយ​សញ្ជាតូបនីយកម្ម​ជាចង្កោមគ្រួសារ ដល់គ្រួសារលោក ធីអាហ្គូ តេយសឺរ៉ា ម៉ាឆាដូ ដែលមានសមាជិក៖ ១-លោក ធីអាហ្គូ តេយសឺរ៉ ម៉ាឆាដូ (THIAGO TEIXEIRA MACHADO) ជនជាតិប្រេស៊ីល សញ្ជាតិប្រេស៊ីល កើតថ្ងៃទី២៨ ខែកក្កដា ឆ្នាំ១៩៨៨ នៅរដ្ឋ Sao Pauko សាធារណរដ្ឋសហព័ន្ធប្រេស៊ីល (ជាប្តី)។ ២-លោកស្រី រ៉ូម៉ា ម៉ារៀ រ៉ហ្សានស្កា ស្តេហ្វហ្វែន (ROMA MARIA ROZANSKA-STEFFEN) ជនជាតិប៉ូឡូញ សញ្ជាតិអាមេរិក កើតថ្ងៃទី២១ ខែមេសា ឆ្នាំ១៩៨៣ នៅសាធារណរដ្ឋប៉ូឡូញ (ជាប្រពន្ធ)។

សូមរម្លឹកថា ការទទួលសញ្ជាតិខ្មែររបស់​កីឡាករប្រដាល់ ប្រេស៊ីល ធីអាហ្គូ និងភរិយានេះ បានកើតឡើងតែ ២ថ្ងៃប៉ុណ្ណោះ ក្រោយពីសម្តេចតេជោ ហ៊ុន សែន បានប្រកាស​ថា សម្តេច​ នឹងទូលស្នើព្រះមហាក្សត្រ ផ្តល់សញ្ជាតិខ្មែរ ដល់កីឡាករប្រដាល់ ប្រេស៊ីល រូបនេះ​ ក្រោយពីកីឡាកររូបនេះ បានផ្សព្វផ្សាយពីប្រដាល់គុនខ្មែរ​ ហើយត្រូវបានថៃ ដកហូតខ្មែរក្រវ៉ាត់ និងហាម​មិន​ឱ្យ​ឡើងវ៉ៃ​ក្នុងប្រទេសថៃទៀតឡើយ។

សម្តេចតេជោ ហ៊ុន សែន បានផ្តល់​លុយដល់កីឡាករប្រេស៊ីល ធីអាហ្គូ ២ម៉ឺនដុល្លារ ហើយ​ក្រោយមក រដ្ឋមន្ត្រី និងឧកញ៉ាជាច្រើន បានផ្តល់​លុយរាប់ពាន់ដុល្លារ​ ដល់កីឡាកររូបនេះ​ផងដែរ៕