រយៈពេល ២ថ្ងៃ អធិការរដ្ឋាននគរបាលស្រុកចិត្របុរី បានចុះបង្រ្កាបទីតាំងល្បែងស៊ីសងខុសច្បាប់ ចំនួន ២កន្លែង នៅឃុំសំបុក ស្រុកចិត្របុរី ខេត្តក្រចេះ

(ក្រចេះ) ៖ ដើម្បីឆ្លើយតបតាមគោលនយោបាយ ភូមិឃុំមានសុវត្ថិភាព លោកឧត្តមសេនីយ៍ទោ អ៊ូ សុបុណ្ណា ស្នងការនគរបាលខេត្តក្រចេះ បានបញ្ជាឱ្យកម្លាំងជំនាញ នៃអធិការរដ្ឋាននគរបាលស្រុកចិត្របុរី សហការជាមួយនឹងកម្លាំងប៉ុស្តិ៍នគរបាលរដ្ឋបាលឃុំសំបុក បានចុះបង្ក្រាបកន្លែងល្បែងស៊ីសងខុសច្បាប់ ចំនួន ០២ កន្លែង នៅក្នុងភូមិសាស្រ្តនិងភូមិសំបុក ឃុំសំបុក ស្រុកចិត្របុរី ខេត្តក្រចេះ ។

យោងតាមរបាយការណ៍ពីសមត្ថកិច្ច បានឱ្យដឹងថា នៅថ្ងៃទី១៦ ខែធ្នូ ឆ្នាំ២០២៣ ម៉ោង ១៥ ៖ ០០ នាទី ម្សិលមិញនេះ កម្លាំងអធិការស្រុកចិត្របុរី សហការជាមួយនគរបាលរដ្ឋបាលឃុំសំបុក បានចុះបង្រ្កាបល្បែងស៊ីសងខុសច្បាប់ ០១ កន្លែង នៅចំណុចក្នុងរោងចំការដាំស្មៅ ដែលមានម្ចាស់ឈ្មោះ អេង រ៉ា ភេទស្រី អាយុ ៤៨ ឆ្នាំ ជនជាតិខ្មែរ មុខរបរកសិករ នៅភូមិស្រែតាហែន ឃុំសំបុក ស្រុកចិត្របុរី ខេត្តក្រចេះ ។

គួរបញ្ជាក់ដែរថា កាលពីថ្ងៃទី១៥ ខែធ្នូ ឆ្នាំ២០២៣ កម្លាំងជំនាញ នៃអធិការដ្ឋាននគរបាលស្រុកចិត្របុរី បានសហការជាមួយកម្លាំងប៉ុស្តិនគរបាលសំបុក ដដែល បានចុះបង្រ្កាបទីតាំងជល់មាន់ ០១ កន្លែង ផ្សេងទៀត នៅចំណុចក្នុងព្រៃទល់មុខវត្តសំបុក ចម្ងាយប្រហែល ៨០០ ម៉ែត្រ ភូមិសំបុក ឃុំសំបុក ស្រុកចិត្របុរី ខេត្តក្រចេះ ។

ពេលកម្លាំងនគរបាលចុះទៅដល់ អ្នកលេងល្បែងភ្នាល់ទាំងនោះដឹងខ្លួនមុនរត់គេចខ្លួនអស់ដោយបន្សល់ទុកនូវសម្ភារ:វត្ថុតាងរួមមាន៖ មាន់ជល់ ចំនួន ០១ ក្បាល, កន្រ្តកដាក់មាន់មកជល់ ចំនួន ០១, តង់របាំងសង្វៀនសម្រាប់ជល់មាន់ ចំនួន ០១ ខ្សែ ប្រវែង ២៥ ម៉ែត្រ, កំណាត់ឈើមូលសម្រាប់អង្គុយមើលគេជល់មាន់ ចំនួន ៣០ កំណាត់ និងចម្រឹងឈើ ចំនួន ១៥ បង្គោល ។ ចំពោះវត្ថុតាងខាងលើដុតបំផ្លាញចោលនៅនឹងកន្លែង ៕