(សៀមរាប) ៖ បុរសជាអ្នកលក់ដូរម្នាក់ ត្រូវបានសមត្ថកិច្ចឃាត់ខ្លួន បន្ទាប់ពីមាននារីជានិស្សិតម្នាក់ប្តឹងថា ទិញបាយសាច់ជ្រូកខ្ចប់ ០១ ប្រអប់ តម្លៃ ៤.០០០ រៀល ហើយនាងច្រឡំបាញ់លុយ ចំនួន ៤.០០០ ដុល្លារ ចូលគណនីរបស់ជនសង្ស័យ នៅពេលដឹងថាបាញ់លុយច្រឡំ នាងក៏បានមកសុំប្រាក់នោះពីជនសង្ស័យវិញ តែជនសង្ស័យមិនព្រមប្រគល់ប្រាក់ឱ្យវិញ រួចនាងក៏ដាក់ពាក្យបណ្តឹងមកកាន់នគរបាលក្រុងសៀមរាប ដើម្បីជួយយកលុយនោះមកឱ្យនាងវិញ ។
ហេតុការណ៍វេរលុយច្រឡំខាងលើនេះ បានកើតហេតុកាលពីវេលាម៉ោង ០៩ ៖ ១៨ នាទីព្រឹក ថ្ងៃទី១ ខែធ្នូ ឆ្នាំ២០២៣ នៅចំណុចហាងលក់បាយមួយកន្លែង ស្ថិតក្នុងក្រុមទី១ ភូមិជន្លង់ សង្កាត់សាលាកំរើក ក្រុងសៀមរាប ខេត្តសៀមរាប ។លោកវរសេនីយ៍ឯក នួន ស័ក្តិចំរើនរិទ្ធិ ស្នងការរងនគរបាលទទួលផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាប បានឱ្យដឹងនៅរសៀលថ្ងៃទី១២ ខែធ្នូ ឆ្នាំ២០២៣ ថា ជនរងគ្រោះឈ្មោះ ចែត ខ្លូត ភេទស្រី អាយុ ២១ ឆ្នាំ មុខរបរនិស្សិត រស់នៅភូមិស្ទឹង ឃុំបាគង ស្រុកប្រាសាទបាគង ខេត្តសៀមរាប ។ ចំណែកជនសង្ស័យឈ្មោះ សំ យោធិន ភេទប្រុស អាយុ ៤៨ ឆ្នាំ មុខរបរលក់ដូរ មានស្រុកកំណើតនៅភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប ទីលំនៅបច្ចុប្បន្នភូមិគោកធ្លក ឃុំកណ្តែក ស្រុកប្រាសាទបាគង ខេត្តសៀមរាប ។
លោកស្នងការរងនគរបាលទទួលផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាប បានឱ្យដឹងបន្តថា យោងតាមពាក្យបណ្តឹងរបស់ជនរងគ្រោះ បានប្តឹងថា មុនពេលកើតហេតុ កាលពីថ្ងៃទី១ ខែធ្នូ ឆ្នាំ២០២៣ វេលាម៉ោង ០៩ ៖ ១៨ នាទីព្រឹក ស្ថិតនៅចំណុចហាងលក់បាយ ក្នុងក្រុមទី១ ភូមិជន្លង់ សង្កាត់សាលាកំរើក ក្រុងសៀមរាប ខេត្តសៀមរាប ជនរងគ្រោះបានទិញបាយសាច់ជ្រូកខ្ចប់ ០១ ប្រអប់ ក្នុងតម្លៃ ៤.០០០ រៀល ។
ជនរងគ្រោះ បានបន្តថា ដោយសារខ្លួនពុំមានលុយជាប់ខ្លួន ក៏សុំ QR Code របស់ជនសង្ស័យ ដើម្បីផ្ទេរលុយ ចំនួន ៤.០០០ រៀល ឱ្យថ្លៃបាយ ប៉ុន្តែពេលនោះខ្លួនច្រឡំស្គេនខាងលុយដុល្លារ ហើយបានផ្ទេរលុយ ចំនួន ៤.០០០ ដុល្លារ ចូលគណនីរបស់ជនសង្ស័យទៅវិញ ។ លុះនៅថ្ងៃទី២ ខែធ្នូ ឆ្នាំ២០២៣ រូបនាងដឹងថា នាងបានផ្ទេរលុយច្រឡំ ហើយក៏បានសុំលុយនោះពីជនសង្ស័យវិញ តែជនសង្ស័យមិនព្រមប្រគល់លុយនោះឱ្យនាងវិញនោះទេ រួចខ្លួនក៏បានដាក់ពាក្យបណ្តឹង មកកាន់នគរបាលក្រុងសៀមរាប ដើម្បីជួយយកលុយនោះឱ្យខ្លួនវិញ ។
ក្រោយសមត្ថកិច្ចហៅមកសួរនាំ ក៏សុំគោលការណ៍ពីថ្នាក់លើ និងតំណាងអយ្យការអមសាលាដំបូងខេត្តសៀមរាប ធ្វើការឃាត់ខ្លួន និងដកហូតវត្ថុតាងបាន រួមមាន ៖ ប្រាក់ដុល្លារ ចំនួន ៥៤៥ ដុល្លារ, ប្រាក់ថៃ ចំនួន ២៤០ បាត, ប្រាក់រៀល ចំនួន ៨.២០០ រៀល, ទូរសព្ទដៃ ចំនួន ០២ គ្រឿង និងម៉ូតូ ចំនួន ០១ គ្រឿង ។ សមត្ថកិច្ចបានធ្វើតេស្តជនសង្ស័យ ដើម្បីស្វែងរកសារធាតុញៀន ជាលទ្ធផលគឺអវិជ្ជមាន ។
បច្ចុប្បន្នជនសង្ស័យខាងលើ ត្រូវបានកម្លាំងនគរបាលព្រហ្មទណ្ឌក្រុងសៀមរាប ធ្វើការសាកសួរ និងកសាងសំណុំរឿងបញ្ជូនមកការិយាល័យជំនាញ និងបញ្ជូនបន្តទៅស្ថាប័នអយ្យការអមសាលាដំបូងខេត្តសៀមរាប ដើម្បីចាត់ការបន្តតាមនីតិវិធី ៕
.jpg)