បើកបរមិនប្រុងប្រយ័ត្ន​ បណ្ដាលឱ្យរថយន្ត ១គ្រឿង ក្រឡាប់ធ្លាក់ទឹកផ្ងារជើង ខណៈចំពេលភ្លៀងខ្លាំងដាច់ផ្លូវ​ នៅខេត្តកោះកុង

(កោះកុង) ៖​ រថយន្ត Ford ០១ គ្រឿងក្រឡាប់ផ្ងារជើង ខណៈមេឃកំពុងធ្លាក់ភ្លៀងខ្លាំង ដោយបានធ្វើដំណើរទាំងយប់ បើកបរដោយជនជាតិចិន ជួបគ្រោះថ្នាក់ក្រឡាប់ឡាន រមៀលធ្លាក់ចូលជ្រោះ ដែលមានទឹកកំពុងហូរខ្លាំង លើផ្លូវជាតិលេខ១០ ស្ថិតក្នុងស្រុកមណ្ឌលសីមា ខេត្តកោះកុង ។

លោក សុខ ភារម្យ អភិបាលស្រុកមណ្ឌលសីមា បានឱ្យដឹងថា ហេតុការណ៍នេះ​ បានកើតឡើង កាលពីវេលាម៉ោង ០៩ ៖ ០០ យប់ ថ្ងៃទី២២ ខែមិថុនា ឆ្នាំ២០២៤ ស្ថិតនៅលើដងផ្លូវជាតិលេខ១០ ក្នុងភូមិសាស្រ្តស្រុកមណ្ឌលសីមា ព្រោះតែមានករណីទឹកហូរដាច់ផ្លូវ បណ្តាលឱ្យរថយន្ត ០១ គ្រឿង ម៉ាក​ FORD​ ពាក់ផ្លាកលេខ​ 2AM-4748 ក្រឡាប់ផ្ងារជើង​ បើកបរដោយជនជាតិចិន​ តែពុំមានរបួសធ្ងន់ឡើយ ។

បើតាម លោក អន ដាវុធ ប្រធានមន្ទីរសាធារណការ​ និងដឹកជញ្ជូនខេត្តកោះកុង បានឱ្យដឹងថា ការដាច់ផ្លូវនេះ គឺបណ្តាលមកពីក្រុមការងារស្ថាបនាផ្លូវជាតិលេខ១០ បានដាក់លូបង្ហូរទឹកលើផ្លូវវាង ត្រង់ចំណុចការសាងសង់ស្ពាន មានទំហំតូចជាងលំហូរទឹកភ្លៀង ទើបបណ្តាលឱ្យដាច់ផ្លូវ ហើយក៏ចំពេលដែលរថយន្តនោះ បានបើកបរឆ្លងកាត់ដែរ ខណៈកម្លាំងទឹកភ្លៀងកំពុងហក់ឡើងខ្ពស់ ។

សូមបញ្ជាក់ថា​ ចំណុចដែលរថយន្តរងគ្រោះថ្នាក់នេះ គឺស្ថិតនៅត្រង់ចំណុចគីឡូម៉ែត្រ​១៧៥ ​គិតទិសដៅពីសំឡូតមកកោះកុង និងចម្ងាយ​ ២១ គីឡូម៉ែត្រ ពីក្រុងខេមរភូមិន្ទ ខេត្តកោះកុង ។

បច្ចុប្បន្ន ក្រុមហ៊ុន CRBC ដែលក្រុមហ៊ុនទទួលបានសិទ្ធិស្ថាបនាផ្លូវនេះ កំពុងចាត់បញ្ជូនគ្រឿងចក្របន្ថែម ដើម្បីតភ្ជាប់តំបន់ចំណុចដែលរងការខូចខាតដោយជំនន់ទឹកភ្លៀងនេះឡើងវិញ ខណៈសព្វថ្ងៃការចរាចររបស់ពលរដ្ឋមានការមមាញឹកខ្លាំងជាងកន្លងមក ៕